ਅੰਮ੍ਰਿਤਸਰ, 8 ਮਈ (ਲਿਕੇਸ਼ ਸ਼ਰਮਾ – ਵਿਕਾਸ ਮਠਾੜੂ) : ਸਰਕਾਰ ਵੱਲੋਂ ਸ਼ੁਰੂ ਕੀਤੀ ਗਈ ਸਕੀਮ ਸਵੈ ਮਿੱਤਵਾ ਤਹਿਤ ਲਾਲ ਲਕੀਰ ਦੇ ਘੇਰੇ ਅੰਦਰ ਰਹਿੰਦੇ ਲੋਕਾਂ ਨੂੰ ਉਨਾਂ ਦੇ ਘਰਾਂ ਦੇ ਮਾਲਕੀ ਹੱਕ ਦਿੱਤੇ ਜਾਣਗੇ, ਜਿਸ ਨਾਲ ਉਹ ਇਸ ਮਕਾਨ ਨੂੰ ਅੱਗੇ ਤਬਦੀਲ, ਵੇਚ ਜਾਂ ਕਰਜ਼ਾ ਆਦਿ ਵਗੈਰਾ ਲੈ ਸਕਣਗੇ। ਅੱਜ ਮਾਲ ਵਿਭਾਗ ਦੇ ਵਿਸ਼ੇਸ਼ ਸਕੱਤਰ ਕਮ ਮਿਸ਼ਨ ਡਾਇਰੈਕਟਰ ਸਵੈ ਮਿੱਤਵਾ ਸ੍ਰੀ ਕੇਸ਼ਵ ਹਿੰਗੋਨੀਆ ਨੇ ਅੱਜ ਅੰਮ੍ਰਿਤਸਰ ਵਿਚ ਐਸ ਡੀ ਐਮ, ਜਿਲ੍ਹਾ ਮਾਲ ਅਧਿਕਾਰੀ, ਤਹਿਸੀਲਦਾਰ, ਡੀ ਡੀ ਪੀ ਓ, ਨਾਇਬ ਤਹਿਸਾਲਦਾਰਾਂ, ਬੀ ਡੀ ਪੀ ਓ ਨਾਲ ਇਸ ਵਿਸ਼ੇ ਉਤੇ ਵਿਸਥਾਰ ਵਿਚ ਮੀਟਿੰਗ ਕਰਦੇ ਦੱਸਿਆ ਕਿ ਮੇਰਾ ਘਰ ਮੇਰੇ ਨਾਮ ਪ੍ਰੋਗਰਾਮ ਤਹਿਤ ਸਰਕਾਰ ਉਨਾਂ ਸਾਰੇ ਲੋਕਾਂ ਨੂੰ ਮਾਲਕੀ ਦਾ ਕਾਨੂੰਨੀ ਹੱਕ ਦੇਣ ਜਾ ਰਹੀ ਹੈ, ਜੋ ਕਿ ਕਈ ਵਰਿ੍ਹਆਂ ਤੋਂ ਉਕਤ ਘਰਾਂ ਵਿਚ ਲਾਲ ਲਕੀਰ ਦੇ ਘੇਰੇ ਅੰਦਰ ਰਹਿ ਰਹੇ ਹਨ, ਪਰ ਮਾਲ ਵਿਭਾਗ ਕੋਲ ਉਨਾਂ ਦਾ ਕੋਈ ਰਿਕਾਰਡ ਨਾ ਹੋਣ ਕਾਰਨ ਅਜਿਹੇ ਪਲਾਟਾਂ ਜਾਂ ਘਰਾਂ ਨੂੰ ਕਿਸੇ ਵੀ ਵਿੱਤੀ ਲੈਣ ਦੇਣ ਲਈ ਨਹੀਂ ਵਰਤਿਆ ਜਾ ਸਕਦਾ। ਉਨਾਂ ਕਿਹਾ ਕਿ ਇਸ ਲਈ ਅੰਮ੍ਰਿਤਸਰ ਜਿਲ੍ਹੇ ਦੇ 743 ਪਿੰਡਾਂ ਦਾ ਸਰਵੈ ਡਰੋਨ ਦੀ ਸਹਾਇਤਾ ਨਾਲ ਕੀਤਾ ਜਾਵੇਗਾ, ਜੋ ਕਿ ਅਗਲੇ ਕੁੱਝ ਦਿਨਾਂ ਵਿਚ ਸ਼ੁਰੂ ਹੋ ਜਾਵੇਗਾ। ਇਸ ਸਰਵੈ ਮਗਰੋਂ ਪਿੰਡ ਪੱਧਰ ਉਤੇ ਤਾਇਨਾਤ ਕੀਤਾ ਗਿਆ ਅਧਿਕਾਰੀ, ਜਿਸ ਵਿਚ ਪਟਵਾਰੀ ਜਾਂ ਪੰਚਾਇਤ ਸਕੱਤਰ ਹੋ ਸਕਦਾ ਹੈ, ਉਹ ਘਰ-ਘਰ ਜਾ ਕੇ ਉਕਤ ਘਰਾਂ ਦੀ ਮਾਲਕੀ ਵੇਖੇਗਾ ਤੇ ਰਜਿਸਟਰ ਵਿਚ ਦਰਜ ਕਰੇਗਾ। ਇਸ ਮਗਰੋਂ ਜੋ ਰਿਪੋਰਟ ਤਿਆਰ ਹੋਵੇਗੀ, ਉਸ ਨੂੰ ਪੰਚਾਇਤ ਘਰ ਵਿਚ ਨੋਟਿਸ ਬੋਰਡ ਉਤੇ ਲਗਾਇਆ ਜਾਵੇਗਾ।ਜੇਕਰ ਕਿਸੇ ਵਿਅਕਤੀ ਨੂੰ ਇਸ ਰਿਪੋਰਟ ਉਤੇ ਕੋਈ ਇਤਰਾਜ਼ ਹੋਵੇਗਾ ਤਾਂ ਉਹ ਇਹ ਇਤਰਾਜ਼ ਲਿਖਤੀ ਤੌਰ ਉਤੇ ਸਬੰਧਤ ਤਹਿਸੀਲਦਾਰ ਜਾਂ ਨਾਇਬ ਤਹਿਸੀਲਦਾਰ ਕੋਲ ਦਰਜ ਕਰਵਾਏਗਾ, ਜੋ ਕਿ ਇਸ ਇਤਰਾਜ਼ ਉਤੇ ਕਾਰਵਾਈ ਕਰਕੇ ਸਬੰਧਤ ਸੋਧ ਕਰਨਗੇ। ਇਸ ਮਗਰੋਂ ਉਕਤ ਮਾਲਕਾਂ ਨੂੰ ਮਾਲਕੀ ਦਾ ਕਾਨੂੰਨੀ ਹੱਕ ਦੇ ਦਿੱਤਾ ਜਾਵੇਗਾ, ਜਿਸ ਨਾਲ ਉਹ ਕਿਸੇ ਬੈਂਕ ਕੋਲ ਕਰਜ਼ਾ ਵਗੈਰਾ ਲੈ ਸਕੇਗਾ ਜਾਂ ਇਸ ਨੂੰ ਆਮ ਪਲਾਟਾਂ ਵਾਂਗ ਤਹਿਸੀਲ ਵਿਚ ਰਜਿਸਟਰੀ ਕਰ ਸਕੇਗਾ।ਹਿੰਗੋਨੀਆ ਨੇ ਪੰਚਾਇਤ ਵਿਭਾਗ ਨੂੰ ਹਦਾਇਤ ਕੀਤੀ ਕਿ ਉਹ ਇਸ ਕੰਮ ਦੇ ਸ਼ੁਰੂ ਹੋਣ ਤੋਂ ਪਹਿਲਾਂ ਪਿੰਡਾਂ ਵਿਚ ਅਨਾਊਂਸਮੈਂਟ ਕਰਵਾ ਦੇਣ ਤਾਂ ਜੋ ਲੋਕਾਂ ਨੂੰ ਇਸ ਸਬੰਧੀ ਮੁੱਢਲੀ ਜਾਣਕਾਰੀ ਮਿਲ ਜਾਵੇ ਤੇ ਉਹ ਇਸ ਕੰਮ ਵਿਚ ਸਰਕਾਰ ਦਾ ਸਹਿਯੋਗ ਕਰਨ।ਇਸ ਮੌਕੇ ਐਸ ਡੀ ਐਮ ਹਰਪ੍ਰੀਤ ਸਿੰਘ, ਐਸ ਡੀ ਐਮ ਮਨਕੰਵਲ ਸਿੰਘ ਚਾਹਲ, ਡੀ ਆਰ ਓ ਕਿਸ਼ਨ ਕੁਮਾਰ, ਡੀ ਡੀ ਪੀ ਓ ਨਵਦੀਪ ਕੌਰ ਅਤੇ ਹੋਰ ਅਧਿਕਾਰੀ ਹਾਜ਼ਰ ਸਨ।
