ਮੋਹਾਲੀ, 30 ਜਨਵਰੀ (ਭਗਵਾਨ ਭੰਗੂ- ਲਿਕੇਸ ਸ਼ਰਮਾ ) ਥਾਣਾ ਸੋਹਾਣਾ ਦੀ ਪੁਲੀਸ ਨੇ ਨਵਜਾਤ ਬੱਚੇ ਦੀ ਤਸਕਰੀ ਵਾਲੇ ਗਿਰੋਹ ਨੂੰ ਕਾਬੂ ਕਰਨ ਦਾ ਦਾਅਵਾ ਕੀਤਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਡੀ ਐਸ ਪੀ ਸ਼ਹਿਰੀ ਹਰਸਿਮਰਨ ਸਿੰਘ ਬੱਲ ਨੇ ਦਸਿਆ ਕਿ ਇੰਸਪੈਕਟਰ ਗੁਰਚਰਨ ਸਿੰਘ ਮੁੱਖ ਅਫਸਰ ਸੋਹਾਣਾ ਦੀ ਅਗਵਾਈ ਵਿੱਚ ਖੁਫੀਆ ਸੂਚਨਾ ਦੇ ਆਧਾਰ ਤੇ ਪੁਲੀਸ ਟੀਮ ਨੇ ਚਰਨਵੀਰ ਸਿੰਘ, ਸਾਕਸ਼ੀ ਦੋਵੇਂ ਵਸਨੀਕ ਪਟਿਆਲਾ, ਮਨਜਿੰਦਰ ਸਿੰਘ ਤੇ ਪਰਵਿੰਦਰ ਕੌਰ ਦੋਵੇਂ ਵਸਨੀਕ ਫਰੀਦਕੋਟ ਨੂੰ ਗ੍ਰਿਫਤਾਰ ਕਰਕੇ ਉਹਨਾਂ ਤੋਂ 5 ਦਿਨ ਦੀ ਨਵਜਾਤ ਬੱਚੀ ਨੂੰ ਬਰਾਮਦ ਕੀਤਾ ਹੈ। ਸੋਹਾਣਾ ਪੁਲੀਸ ਨੇ ਇਸ ਸਬੰਧੀ ਆਈ ਪੀ ਸੀ ਦੀ ਧਾਰਾ 370(5),120 ਬੀ ਅਤੇ ਜੂਵੀਨਿਲ ਜਸਟਿਸ ਪ੍ਰੋਟੈਕਸਨ ਆਫ ਚਿਲਡਰਨ ਐਕਟ 2015 ਦੀ ਧਾਰਾ 81 ਅਧੀਨ ਮਾਮਲਾ ਦਰਜ ਕੀਤਾ ਹੈ। ਉਹਨਾਂ ਕਿਹਾ ਕਿ ਨਵਜਾਤ ਬੱਚੀ ਦੇ ਅਸਲ ਮਾਤਾ ਪਿਤਾ ਕਿਰਨ ਪਤਨੀ ਕੁਲਦੀਪ ਕੁਮਾਰ ਵਸਨੀਕ ਫਰੀਦਕੋਟ ਹਨ।
ਉਹਨਾਂ ਦਸਿਆ ਕਿ ਪੁਲੀਸ ਵਲੋਂ ਇਸ ਗਲ ਦੀ ਜਾਂਚ ਕੀਤੀ ਜਾ ਰਹੀ ਹੈ ਕਿ ਉਕਤ ਗਿਰੋਹ ਨੇ ਕਿੰਨੇ ਬਚਿਆਂ ਦੀ ਤਸਕਰੀ ਕੀਤੀ ਹੈ ਅਤੇ ਉਹਨਾਂ ਦੇ ਅਸਲ ਮਾਤਾ ਪਿਤਾ ਕੌਣ ਹਨ ਅਤੇ ਬੱਚੇ ਕਿਥੇ ਸਪਲਾਈ ਕੀਤੇ ਹਨ।
