ਪੰਜਾਬ ਦੇਸ਼ ਦੇ ਸਭ ਤੋਂ ਵੱਡੇ ਕਰਜ਼ਦਾਰ ਰਾਜਾਂ ਵਿੱਚੋਂ ਇੱਕ ਹੈ। ਜਿੱਥੇ ਲੰਬੇ ਸਮੇਂ ਤੋਂ ਕੀਤੇ ਪੰਜਾਬ ਦੇ ਜਿੰਮੇ ਭਾਰੀ ਕਰਜ ਦੀ ਪੰਡ ਦੀ ਕਿਸ਼ਤ ਦਾ ਵਿਆਜ ਮੋੜਣ ਲਈ ਵੀ ਹੋਰ ਵਿਆਜ ਲੈਣਾ ਪੈਂਦਾ ਹੈ। ਜਦੋਂ ਕਿਤੇ ਪੰਜਾਬ ਸਿਰ ਇਸ ਵੱਡੀ ਕਰਜ਼ ਦੀ ਪੰਡ ਬਾਰੇ ਚਰਚਾ ਹੁੰਦੀ ਹੈ ਤਾਂ ਸਭ ਰਾਜਨਾਤਿਕ ਪਾਰਟੀਆਂ ਪੰਜਾਬ ਨੂੰ ਕਰਜਾ ਮੁਕਤ ਕਰਨ ਲਈ ਖੁਦ ਨੂੰ ਭਾਰੀ ਫਿਕਰਮੰਦ ਦਰਸਾਉਣ ਲਈ ਰਾਜ ਵਿਚ ਵੀਆਈਪੀ ਕਲਚਰ ਨੂੰ ਘਟਾਉਣ ਅਤੇ ਵਾਧੂ ਖਰਚ ਨੂੰ ਬੰਦ ਕਰਨ ਦੇ ਦਾਅਵੇ ਕਰਦੀਆਂ ਹਨ। ਪਰ ਹੁਣ ਤੱਕ ਇਹ ਸਭ ਸਟੇਜਾਂ ਤੋਂ ਭਾਸ਼ਣਾਂ ਅਤੇ ਅਖਬਾਰਾਂ ਦੀਆਂ ਸੁਰਖੀਆਂ ਤੱਕ ਹੀ ਸੀਮਤ ਰਿਹਾ ਹੈ ਅਤੇ ਜਨਤਾ ਦੇ ਖੂਨ ਪਸੀਨੇ ਦੀ ਕਮਾਈ ਨੂੰ ਰਾਜਨੀਤਿਕ ਲੋਕ ਕਿਸ ਤਰ੍ਹਾਂ ਵਹਾਉਂਦੇ ਹਨ ਇਸਦੀ ਮਿਸਾਲ ਆਰ.ਟੀ.ਆਈ ਰਾਹੀਂ ਮੰਗੀ ਗਈ ਜਾਣਕਾਰੀ ਦੇ ਅਧਾਰ ’ਤੇ ਹੋਏ ਖੁਲਾਸੇ ਤੋਂ ਮਿਲਦੀ ਹੈ ਜਿਸਦੀ ਅੱਜ ਕੱਲ੍ਹ ਖੂਬ ਚਰਚਾ ਹੋ ਰਹੀ ਹੈ। ਇਹ ਖੁਲਾਸਾ ਹੋਇਆ ਹੈ ਕਿ ਪਿਛਲੇ 1 ਸਾਲ ਤੋਂ ਕੈਪਟਨ ਅਮਰਿੰਦਰ ਸਿੰਘ, ਚਰਨਜੀਤ ਸਿੰਘ ਚੰਨੀ ਅਤੇ ਮੌਜੂਦਾ ਭਗਵੰਤ ਮਾਨ ਦਾ ਪੰਜਾਬ ਵਿੱਚ ਬਤੌਰ ਮੁੱਖ ਮੰਤਰੀ ਦਾ ਕਾਰਜਕਾਲ ਰਿਹਾ ਹੈ। ਸਾਲ ਵਿੱਚ ਵੱਖ-ਵੱਖ ਮੀਟਿੰਗਾਂ ਵਿੱਚ ਵਿਧਾਇਕਾਂ, ਮੰਤਰੀਆਂ ਅਤੇ ਅਫਸਰਸ਼ਾਹੀ ਲਈ ਪੰਜ ਤਾਰਾ ਹੋਟਲਾਂ ਤੋਂ ਸ਼ਾਹੀ ਭੋਜਨ ਮੰਗਵਾ ਕੇ ਖਜ਼ਾਨੇ ਵਿੱਚੋਂ ਇਕ ਕਰੋੜ 90 ਲੱਖ ਰੁਪਏ ਦੀ ਅਦਾਇਗੀ ਕੀਤੀ ਗਈ। ਇਸ ਵਿੱਚ ਅਪ੍ਰੈਲ 2021 ਤੋਂ ਮਾਰਚ 2022 ਤੱਕ ਦਾ ਵੇਰਵਾ ਹੈ। ਜਿਸ ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਮੁੱਖ ਮੰਤਰੀ ਕਾਰਜਕਾਲ ( ਅਪ੍ਰੈਲ 2021 ਤੋਂ 18 ਸਤੰਬਰ 2021 ਤੱਕ ) ਦੌਰਾਨ 5 ਲੱਖ 34 ਹਜਾਰ ਰੁਪਏ ਦਾ ਸ਼ਾਹੀ ਭੋਜਨ, ਫਿਰ 21 ਸਤੰਬਰ 2021 ਤੋਂ 28 ਫਰਵਰੀ 2022 ਤੱਕ ਕਾਂਗਰਸ ਦੇ ਗਰੀਬ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੇ ਕਾਰਜਕਾਲ ਵਿਚ ਪੰਜ ਤਾਰਾ ਹੋਟਲਾਂ ਤੋਂ ਆਏ ਸ਼ਾਹੀ ਭੋਜ ਦਾ ਖਰਚ 50 ਲੱਖ 7 ਹਜਾਰਰੁਪਏ ਅਤੇ ਉਸ ਤੋਂ ਬਾਅਦ 31 ਮਾਰਚ 2022 ਤੱਕ ਮੌਜੂਦਾ ਮੁੱਖ ਮੰਤਰੀ ਭਗਵੰਤ ਮਾਨ ਦੇ ਕਾਰਜਕਾਲ ਦੀਆਂ ਮੀਟਿੰਗਾਂ ਦੌਰਾਨ ਉਨ੍ਹਾਂ ਲਈ 4 ਲੱਖ 79 ਹਜ਼ਾਰ ਰੁਪਏ ਦੇ ਖਾਣੇ ਦੇ ਆਰਡਰ ਕੀਤੇ ਗਏ ਸਨ। ਚਰਨਜੀਤ ਸਿੰਘ ਚੰਨੀ ਸਾਹਿਬ ਨੇ ਤਾਂ ਬਤੌਰ ਮੁੱਖ ਮੰਤਰੀ 150 ਰੁਪਏ ਪ੍ਰਤੀ ਬੋਤਲ ਪਾਣੀ ਹਿਮਾਚਲ ਪ੍ਰਦੇਸ਼ ਤੋਂ ਮੰਗਵਾਇਆ ਸੀ। ਲੋਕਾਂ ਤੋਂ ਟੈਕਸ ਅਤੇ ਹੋਰ ਰੂਪਾਂ ਦੀ ਵਸੂਲੀ ਕਰਕੇ ਖਜ਼ਾਨੇ ਦੀ ਇਸ ਤਰ੍ਹਾਂ ਨਾਲ ਲੁੱਟ ਕੀਤੀ ਜਾ ਰਹੀ ਹੈ। ਤੁਹਾਨੂੰ ਯਾਦ ਹੋਵੇਗਾ ਕਿ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੇ ਆਪਣੇ ਪੁੱਤਰ ਦੇ ਵਿਆਹ ਮੌਕੇ ਗੁਰੂਦੁਆਰਾ ਸਾਹਿਬ ਵਿੱਚ ਇੱਕ ਪੰਕਤੀ ਵਿਚ ਸੰਗਤ ਨਾਲ ਬੈਠ ਤੇ ਆਪਣੇ ਪਰਿਵਾਰ ਸਮੇਤ ਲੰਗਰ ਛਕਿਆ ਸੀ ਜਿਸਦੀ ਦੀ ਫੋਟੋ ਅਤੇ ਵੀਡੀਓ ਖੂਬ ਵਾਇਰਲ ਹੋਈ ਸੀ। ਉਸ ਸਮੇਂ ਕਾਂਗਰਸ ਪਾਰਟੀ ਵੱਲੋਂ ਚਰਨਜੀਤ ਸਿੰਘ ਚੰਨੀ ਨੂੰ ਇੱਕ ਸਾਧਾਰਨ ਅਤੇ ਗਰੀਬ ਮੁੱਖ ਮੰਤਰੀ ਵਜੋਂ ਖੂਬ ਪ੍ਰਚਾਰਿਤ ਕੀਤਾ ਸੀ। ਕੁਝ ਦਿਨਾਂ ਬਾਅਦ ਉਸਦੇ ਬੇਟੇ ਦੇ ਵਿਆਹ ਦੀ ਰਿਸੈਪਸ਼ਨ ਦੀ ਵੀ ਕਾਫੀ ਚਰਚਾ ਹੋਈ ਸੀ। ਸ਼ਾਹੀ ਖਾਣੇ ’ਤੇ ਖਰਚੇ ਦਾ ਆਰ ਟੀ ਆਈ ਰਾਹੀਂ ਖੁਲਾਸੇ ਨੇ ਸਭ ਕੁਝ ਸਾਹਮਣੇ ਲਿਆ ਦਿੱਤਾ। ਭਗਵੰਤ ਮਾਨ ਸਰਕਾਰ ਭਾਵੇਂ ਵੀਆਈਪੀ ਕਲਚਰ ਅਤੇ ਵਾਧੂ ਖਰਚਿਆਂ ਨੂੰ ਕੰਟਰੋਲ ਕਰਨ ਦਾ ਦਾਅਵਾ ਕਰ ਰਹੀ ਹੈ ਪਰ ਅਸਲ ’ਚ ਭਗਵੰਤ ਮਾਨ ਸਰਕਾਰ ਵੀ ਪਿਛਲੀਆਂ ਸਰਕਾਰਾਂ ਦੇ ਨਕਸ਼ੇ ਕਦਮ ’ਤੇ ਚੱਲ ਰਹੀ ਹੈ। ਸਰਕਾਰ ਵੱਲੋਂ ਵੀ ਇਸੇ ਤਰ੍ਹਾਂ ਦਾ ਕਲਚਰ ਅਪਣਾਇਆ ਗਿਆ ਹੈ। ਇਸ ਤੋਂ ਇਲਾਵਾ ਹੋਰ ਵੀ ਕਈ ਮਾਮਲੇ ਹਨ ਜਿਨ੍ਹਾਂ ਨੂੰ ਆਮ ਆਦਮੀ ਪਾਰਟੀ ਦੀ ਸਰਕਾਰ ਕਾਂਗਰਸ, ਅਕਾਲੀ-ਭਾਜਪਾ ਦੀ ਸਰਕਾਰ ਵਿੱਚ ਕੋਈ ਫਰਕ ਨਹੀਂ ਦਿਖਾਈ ਦੇ ਰਿਹਾ ਹੈ। ਸਿਰਫ਼ ਬਿਆਨਬਾਜ਼ੀ ਨਾਲ ਹਾਲਾਤ ਸੁਧਰਨ ਵਾਲੇ ਨਹੀਂ ਹਨ। ਪੰਜਾਬ ਦੇ ਸਿਰ ’ਤੇ ਕਰਜ਼ੇ ਦੀ ਪੰਡ ਲਗਾਤਾਰ ਵਧਦੀ ਜਾ ਰਹੀ ਹੈ। ਸੂਬੇ ਦੇ ਹਿੱਤਾਂ ਲਈ ਕੰਮ ਕਰਨ ਦੀ ਲੋੜ ਹੈ । ਪਹਿਲੀਆਂ ਸਰਾਕਰਾਂ ਦੇ ਨਕਸ਼ੇ ’ਤੇ ਚੱਲਣ ਦੀ ਬਜਾਏ ਆਪ ਸਰਕਾਰ ਵੱਖਰੀ ਪਹਿਚਾਣ ਕਾਇਮ ਕਰੇ, ਜਿਸ ਆਸ ਨੂੰ ਲੈ ਕੇ ਪੰਜਾਬ ਨਿਵਾਸੀਆਂ ਨੇ ਭਾਰੀ ਬਹੁਮਤ ਨਾਲ ਜਿਤਾ ਕੇ ਸੱਤਾ ਸੰਭਾਲੀ ਹੈ। ਇਸ ਸਮੇਂ ਵੀ ਭ੍ਰਿਸ਼ਟਾਚਾਰ ਪਹਿਲਾਂ ਵਾਂਗ ਚਰਮ ਸੀਮਾ ’ਤੇ ਹੈ। ਰੇਤ ਮਾਫੀਆ,ਸ਼ਰਾਬ ਮਾਫੀਆ ਅਤੇ ਨਸ਼ੇ ਸੂਬੇ ਦੀ ਖੁਸ਼ਹਾਲੀ ਨੂੰ ਖੋਖਲਾ ਕਰ ਰਹੇ ਹਨ। ਸਰਕਾਰ ਦੇ ਮੰਤਰੀ ਰੋਜ਼ ਵੱਡੀਆਂ-ਵੱਡੀਆਂ ਗੱਲਾਂ ਕਰ ਰਹੇ ਹਨ। ਮੁੱਖ ਮੰਤਰੀ ਨੂੰ ਚਾਹੀਦਾ ਹੈ ਕਿ ਉਹ ਜ਼ਮੀਨੀ ਪੱਧਰ ’ਤੇ ਕੀ ਹੋ ਰਿਹਾ ਹੈ, ਇਸ ਬਾਰੇ ਹੇਠਲੇ ਪੱਧਰ ਤੋਂ ਜਾਣਕਾਰੀ ਹਾਸਲ ਕਰਨ। ਜੇਕਰ ਬਦਲਾਅ ਦੇ ਨਾਂ ’ਤੇ ਸੱਤਾ ’ਚ ਆਈ ਆਮ ਆਦਮੀ ਪਾਰਟੀ ਸੱਚਮੁੱਚ ਸੂਬੇ ’ਚ ਬਦਲਾਅ ਲਿਆਉਣਾ ਚਾਹੁੰਦੀ ਹੈ ਅਤੇ ਆਪਣਾ ਵੱਖਰਾ ਅਕਸ ਬਣਾਉਣਾ ਚਾਹੁੰਦੀ ਹੈ ਤਾਂ ਅਤੇ ਦੂਸਰੀਆਂ ਰਾਜਨੀਤਿਕ ਪਾਰਟੀਆਂ ਤੋਂ ਆਪਣੇ ਆਪ ਨੂੰ ਵੱਖ ਰੱਖਣ ਲਈ ਜ਼ਮੀਨੀ ਪੱਧਰ ’ਤੇ ਇਨ੍ਹਾਂ ਸਾਰੀਆਂ ਗੱਲਾਂ ਨੂੰ ਧਿਆਨ ’ਚ ਰੱਖਣਾ ਹੋਵੇਗਾ ਅਤੇ ਸ਼ਾਹੀ ਖਾਣੇ ਵਾਂਗ ਫਾਲਤੂ ਖਰਚ ਕਰਨ ਤੋਂ ਗੁਰੇਜ਼ ਕਰਨਾ ਪਵੇਗਾ ਤਾਂ ਜੋ ਸੂਬੇ ਦੇ ਸਿਰ ’ਤੇ ਪਏ ਭਾਰੀ ਬੋਝ ਨੂੰ ਹਲਕਾ ਕੀਤਾ ਜਾ ਸਕੇ।
ਹਰਵਿੰਦਰ ਸਿੰਘ ਸੱਗੂ ।
