ਚੰਡੀਗੜ੍ਹ : ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਕਾਰਗਿਲ ਦਿਵਸ ਮੌਕੇ ਚੰਡੀਗੜ੍ਹ ਵਿਖੇ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ। ਇਸ ਦੌਰਾਨ ਚੰਡੀਗੜ੍ਹ ਬੋਗਨਵਿਲੀਆ ਵਾਰ ਮੈਮੋਰੀਅਲ ‘ਤੇ ਪਹੁੰਚੇ, ਮਾਨ ਨੇ ਕਿਹਾ ਕਿ ਅਸੀਂ ਆਪਣੇ ਘਰਾਂ ‘ਚ ਏ.ਸੀ ਅਤੇ ਹੀਟਰ ਨਾਲ ਸੌਂਦੇ ਹਾਂ ਪਰ ਸਿਪਾਹੀ ਕੜਾਕੇ ਦੀ ਗਰਮੀ ਅਤੇ ਬਰਫੀਲੀ ਠੰਡ ਵਿੱਚ ਵੀ ਡਿਊਟੀ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਵੱਲੋਂ ਸ਼ਹੀਦ ਜਵਾਨਾਂ ਦੇ ਪਰਿਵਾਰਾਂ ਨੂੰ ਇੱਕ-ਇੱਕ ਕਰੋੜ ਦੀ ਸਹਾਇਤਾ ਦਿੱਤੀ ਜਾ ਰਹੀ ਹੈ। ਸੈਨਿਕਾਂ ਦੀ ਭਲਾਈ ਲਈ ਜੋ ਵੀ ਲੋੜ ਹੈ, ਸਰਕਾਰ ਉਹ ਜ਼ਰੂਰ ਕਰੇਗੀ।ਭਗਵੰਤ ਮਾਨ ਨੇ ਕਿਹਾ ਕਿ ਕਾਰਗਿਲ ਵਿਜੇ ਦਿਵਸ ਵਾਲੇ ਦਿਨ ਸਾਡੇ ਬਹਾਦਰ ਜਵਾਨਾਂ ਨੇ ਟਾਈਗਰ ਹਿੱਲ ਨੂੰ ਫਤਹਿ ਕੀਤਾ ਸੀ।ਉਸ ਸਮੇਂ ਦੇਸ਼ ਅੰਦਰ ਦੇਸ਼ ਭਗਤੀ ਦਾ ਜਜ਼ਬਾ ਸੀ।ਮੈਂ ਉਸ ਸਮੇਂ ਸਿਰਫ਼ ਇੱਕ ਕਲਾਕਾਰ ਸੀ।ਮੈਂ ਸਾਰੇ ਮਸ਼ਹੂਰ ਕਲਾਕਾਰਾਂ ਨੂੰ ਕਿਹਾ ਕਿ ਸਾਨੂੰ ਵੀ ਇਸ ਵਿੱਚ ਯੋਗਦਾਨ ਪਾਉਣਾ ਚਾਹੀਦਾ ਹੈ।ਅਸੀਂ ਲਾਈਵ ਸ਼ੋਅ ਕਰਕੇ ਪੈਸੇ ਇਕੱਠੇ ਕੀਤੇ।ਇਨ੍ਹਾਂ ਸਾਰਿਆਂ ਨੂੰ ਪਟਿਆਲਾ ਛਾਉਣੀ ਦੇ ਮੁਖੀ ਨੂੰ ਦਿੱਤਾ ਗਿਆ।ਫੌਜ ਦੇ ਨਾਲ ਕਈ ਅਜਿਹੇ ਮੌਕੇ ਆਉਂਦੇ ਹਨ, ਜਦੋਂ ਦੁਸ਼ਮਣ ਭਾਰਤ ਦੇ ਖੇਤਰ ਵਿੱਚ ਦਹਿਸ਼ਤ, ਨਸ਼ੇ ਅਤੇ ਡਰੋਨ ਦੀਆਂ ਸਮੱਸਿਆਵਾਂ ਲਿਆ ਰਿਹਾ ਹੁੰਦਾ ਹੈ। ਜਿਸ ਸਮੇਂ ਅਸੀਂ ਏਸੀ ਲਗਾ ਕੇ ਕਮਰੇ ਵਿੱਚ ਸੌਂਦੇ ਹਾਂ, ਬਹਾਦਰ ਸੈਨਿਕ ਜੈਸਲਮੇਰ ਵਿੱਚ 50 ਡਿਗਰੀ ਤੋਂ ਉੱਪਰ ਸਾਡੀ ਰੱਖਿਆ ਕਰਦੇ ਹਨ। ਜਦੋਂ ਅਸੀਂ ਹੀਟਰ ਲਗਾ ਕੇ ਠੰਡ ਤੋਂ ਬਚਣ ਲਈ ਬੈਠਦੇ ਹਾਂ ਤਾਂ ਉਸ ਸਮੇਂ ਉਹ ਟਾਈਗਰ ਹਿੱਲ ਦੀਆਂ ਪਹਾੜੀਆਂ ‘ਤੇ ਮੋਰਚਾ ਲਗਾ ਕੇ ਬੈਠ ਜਾਂਦਾ ਹੈ।
