ਲੁਧਿਆਣਾ(ਅਸਵਨੀ – ਬੋਬੀ ਸਹਿਜਲ)ਫੁੱਲਾਂਵਾਲ ਇਲਾਕੇ ਵਿੱਚ ਹੋਟਲ ਕਾਰੋਬਾਰੀ ਅਤੇ ਉਸਦੇ ਦੋਸਤ ਨੂੰ ਉਨਾਂ ਦੀ ਹੀ ਕਰੇਟਾ ਕਾਰ ਵਿੱਚ ਬੰਧਕ ਬਣਾ ਕੇ ਨਕਦੀ, ਆਈਫੋਨ ਅਤੇ ਜਰੂਰੀ ਦਸਤਾਵੇਜ਼ ਲੁੱਟਣ ਦੀ ਸਨਸਨੀਖੇਜ ਘਟਨਾ ਸਾਹਮਣੇ ਆਈ ਹੈ l ਪਿਸਤੌਲ ਦੀ ਨੋਕ ਤੇ ਮੁਲਜਮਾਂ ਨੇ ਉਨ੍ਹਾਂ ਕੋਲੋਂ ਇਹ ਸਾਰਾ ਸਮਾਨ ਤਾਂ ਲੁੱਟਿਆ ਹੀ ਜਾਂਦੇ ਸਮੇਂ ਉਹ ਮੁਦਈ ਦੀ ਕਰੇਟਾ ਕਾਰ ਅਤੇ ਜ਼ਰੂਰੀ ਦਸਤਾਵੇਜ ਵੀ ਲੁੱਟ ਕੇ ਲੈ ਗਏ। ਮੁਲਜ਼ਮਾਂ ਨੇ ਗੂਗਲ ਪੇ ਦੇ ਜਰੀਏ ਮੁਦਈ ਕੋਲੋਂ ਕੁਝ ਰਕਮ ਵੀ ਮੰਗਵਾਈl ਇਸ ਮਾਮਲੇ ਵਿੱਚ ਥਾਣਾ ਸਦਰ ਦੀ ਪੁਲਿਸ ਨੇ ਡੀਸੈਂਟ ਇਨਕਲੇਵ ਬਾੜੇਵਾਲ ਰੋਡ ਦੇ ਵਾਸੀ ਕਾਰੋਬਾਰੀ ਹਿਮਾਂਸ਼ੂ ਤਾਖਰ ਦੀ ਸ਼ਿਕਾਇਤ ਤੇ ਜੀਕੇ ਸਟੇਟ ਮਿਹਰਬਾਨ ਦੇ ਰਹਿਣ ਵਾਲੇ ਜੁਝਾਰ ਸਿੰਘ , ਸਤਜੋਤ ਨਗਰ ਦੇ ਵਾਸੀ ਅਰਜਨ ਸਿੰਘ, ਵਿੱਕੀ ਅਤੇ ਮਿੰਟੂ ਦੇ ਖਿਲਾਫ ਅਸਲਾ ਐਕਟ, ਵਸੂਲੀ, ਅਪਰਾਧਿਕ ਸਾਜਿਸ਼ , ਲੁੱਟ ਖੋਹ ਅਤੇ ਹੋਰ ਸੰਗੀਨ ਧਾਰਾਵਾਂ ਦੇ ਤਹਿਤ ਮੁਕਦਮਾ ਦਰਜ ਕਰ ਲਿਆ ਹੈ। ਪੁਲਿਸ ਨੂੰ ਜਾਣਕਾਰੀ ਦਿੰਦਿਆਂ ਹਿਮਾਂਸ਼ੂ ਤਾਖਰ ਨੇ ਦੱਸਿਆ ਕਿ ਮੁਲਜਮ ਜੁਝਾਰ ਸਿੰਘ ਨੇ ਆਪਣੇ ਸਾਥੀਆਂ ਨਾਲ ਮਿਲ ਕੇ ਹਿਮਾਂਸ਼ੂ ਅਤੇ ਉਸਦੇ ਦੋਸਤ ਥਰੀ ਕਿੰਗਸ ਹੋਟਲ ਦੇ ਮਾਲਕ ਰਮਨਦੀਪ ਸਿੰਘ ਨੂੰ ਹਿਮਾਂਸ਼ੂ ਦੀ ਕਰੇਟਾ ਕਾਰ ਵਿੱਚ ਹੀ ਬੰਧਕ ਬਣਾ ਲਿਆl ਮੁਲਜਮ ਉਨ੍ਹਾਂ ਨੂੰ ਪੱਖੋਵਾਲ ਰੋਡ ਤੋਂ ਜਵੱਦੀ ਦੇ ਇੱਕ ਘਰ ਵਿੱਚ ਲੈ ਗਏ l ਹਿਮਾਂਸ਼ੂ ਨੇ ਸ਼ਿਕਾਇਤ ਵਿੱਚ ਦੱਸਿਆ ਕਿ ਮੁਲਜ਼ਮਾਂ ਨੇ ਪਿਸਤੌਲ ਦਿਖਾ ਕੇ ਉਨ੍ਹਾਂ ਕੋਲੋਂ ਆਈਫੋਨ ਅਤੇ ਹੋਰ ਮੋਬਾਈਲ ਫੋਨ ਲੁੱਟ ਲਏ l ਮੁਲਜ਼ਮਾਂ ਨੇ ਪਰਸ ਵਿੱਚ ਪਈ 50 ਹਜਾਰ ਰੁਪਏ ਦੀ ਰਕਮ ਵੀ ਕੱਢ ਲਈ l ਐਨਾ ਹੀ ਨਹੀਂ ਮੁਲਜ਼ਮਾਂ ਨੇ ਉਨ੍ਹਾਂ ਕੋਲੋਂ ਇਕ ਲੱਖ ਰੁਪਏ ਮਹੀਨੇ ਦੀ ਮੰਗ ਕੀਤੀ l ਉਨਾਂ ਧਮਕਾਇਆ ਕਿ ਜੇਕਰ ਰਕਮ ਨਾ ਦਿੱਤੀ ਗਈ ਤਾਂ ਉਹ ਉਨ੍ਹਾਂ ਦੀ ਵੀਡੀਓ ਸੋਸ਼ਲ ਮੀਡੀਆ ਤੇ ਵਾਇਰਲ ਕਰ ਦੇਣਗੇ l ਬੁਰੀ ਤਰ੍ਹਾਂ ਧਮਕੀਆਂ ਦੇ ਕੇ ਮੁਲਜਮਾਂ ਨੇ ਉਨ੍ਹਾਂ ਕੋਲੋਂ ਕੁਝ ਰਕਮ ਗੂਗਲ ਪੇ ਦੇ ਜ਼ਰੀਏ ਟ੍ਰਾਂਸਫਰ ਕਰਵਾ ਲਈ l ਕੁਝ ਸਮੇਂ ਬਾਅਦ ਮੁਲਜਮ ਦੋਵਾਂ ਨੂੰ ਬੀਆਰਐਸ ਨਗਰ ਉਤਾਰ ਕੇ ਚਲੇ ਗਏ ਅਤੇ ਉਨਾਂ ਦੀ ਕਰੇਟਾ ਕਾਰ ਲੈਪਟਾਪ, ਬੈਗ ਅਤੇ ਕੁਝ ਜਰੂਰੀ ਦਸਤਾਵੇਜ਼ ਨਾਲ ਲੈ ਗਏ l ਉਧਰੋਂ ਇਸ ਮਾਮਲੇ ਵਿੱਚ ਥਾਣਾ ਸਦਰ ਦੀ ਪੁਲਿਸ ਦਾ ਕਹਿਣਾ ਹੈ ਕਿ ਹਿਮਾਂਸ਼ੂ ਤਾਖਰ ਦੀ ਸ਼ਿਕਾਇਤ ਤੇ ਜੁਝਾਰ ਸਿੰਘ, ਅਰਜਨ ਸਿੰਘ, ਵਿੱਕੀ ਅਤੇ ਮਿੰਟੂ ਦੇ ਖਿਲਾਫ ਸੰਗੀਨ ਧਾਰਾਵਾਂ ਦੇ ਤਹਿਤ ਮੁਕਦਮਾ ਦਰਜ ਕਰਕੇ ਮੁਲਜਮਾਂ ਦੀ ਤਲਾਸ਼ ਸ਼ੁਰੂ ਕਰ ਦਿੱਤੀ ਗਈ ਹੈ।
