ਜਗਰਾਉਂ 8 ਮਾਰਚ (ਵਿਕਾਸ ਮਠਾੜੂ-ਮੋਹਿਤ ਜੈਨ ) ਸਥਾਨਕ ਥਾਣੇ ‘ਚ ਨਜ਼ਾਇਜ਼ ਹਿਰਾਸਤ ‘ਚ ਰੱਖ ਕੇ ਕੁੱਟਮਾਰ ਕਰਨ ਅਤੇ ਕਰੰਟ ਲਗਾ ਕੇ ਨਾਕਾਰਾ ਕੀਤੀ ਗਰੀਬ ਧੀ ਕੁਲਵੰਤ ਕੌਰ ਰਸੂਲਪੁਰ ਦੀ ਮੌਤ ਲਈ ਅਤੇ ਝੂਠਾ ਕੇਸ ਬਣਾਉਣ ਲਈ ਜ਼ਿੰਮੇਵਾਰ ਸੰਗੀਨ ਧਾਰਾਵਾਂ ਤਹਿਤ ਦਰਜ ਮਕੱਦਮਾ ਨੰਬਰ 274/21 ਦੇ ਮੁੱਖ ਦੋਸ਼ੀ ਡੀ ਐਸ ਪੀ ਗੁਰਿੰਦਰ ਬੱਲ ਦੀ ਗ੍ਰਿਫਤਾਰੀ ਲਈ ਇਲਾਕੇ ਦੀਆਂ ਇਨਸਾਫ਼ਪਸੰਦ ਜੱਥੇਬੰਦੀਆਂ ਵਲੋਂ ਕਿਰਤੀ ਕਿਸਾਨ ਯੂਨੀਅਨ ਦੇ ਜਿਲ੍ਹਾ ਪ੍ਰਧਾਨ ਤਰਲੋਚਨ ਸਿੰਘ ਝੋਰੜਾਂ ਤੇ ਕੁੱਲ ਹਿੰਦ ਕਿਸਾਨ ਸਭਾ ਦੇ ਅਾਗੂ ਨਿਰਮਲ ਸਿੰਘ ਧਾਲੀਵਾਲ ਦੀਆਂ ਅਗਵਾਈ ‘ਚ ਏ.ਡੀ.ਸੀ. ਜਗਰਾਉਂ ਮੈਡਮ ਨਯਨ ਜੱਸਲ ਆਈ.ਏ.ਅੈਸ. ਨੂੰ ਗਵਰਨਰ ਪੰਜਾਬ ਦੇ ਨਾਮ ਇੱਕ ਮੰਗ ਪੱਤਰ ਕਮ ਨੋਟਿਸ ਸੌਂਪ ਕੇ ਧਿਆਨ ‘ਚ ਲਿਆਂਦਾ ਕਿ ਬਿਨਾਂ ਅਦਾਲਤੀ ਹੁਕਮਾਂ/ਜ਼ਮਾਨਤ ਦੇ ਜਾਂ ‘ਅਰੈਸਟ ਸਟੇ’ ਦੇ, ਗੈਰਜ਼ਮਾਨਤੀ ਧਾਰਾਵਾਂ ਦੇ ਦੋਸ਼ੀ ਨੂੰ ਜਾਣਬੁੱਝ ਕੇ ਗ੍ਰਿਫਤਾਰ ਨਾਂ ਕਰਨਾ ਸਥਾਨਕ ਪੁਲਿਸ ਅਧਿਕਾਰੀਆਂ ਦਾ ਪੱਖਪਾਤੀ ਵਤੀਰਾ ਹੀ ਨਹੀਂ ਸਗੋਂ ਸਥਾਪਤ ਕਾਨੂੰਨ ਦੀਆਂ ਸ਼ਰੇਆਮ ਧੱਜ਼ੀਆਂ ਉਡਾਉਣ ਵਾਲਾ ਵਤੀਰਾ ਵੀ ਹੈ। ਕਿਸਾਨ ਆਗੂਆਂ ਨੇ ਦੋਸ਼ ਲਗਾਇਆ ਕਿ ਪੁਲਿਸ ਆਮ ਬੰਦੇ ਨੂੰ ਤਾਂ ਧਾਰਾ 7-51 ਦੇ ਦੋਸ਼ਾਂ ਤਹਿਤ ਵੀ ਤੁਰੰਤ ਫੜ ਕੇ 6 ਮਹੀਨੇ ਲਈ ਜੇਲ਼ ‘ਚ ਸੁੱਟ ਦਿੰਦੀ ਏ, ਪਰ ਇਥੇ ਸੰਗੀਨ ਧਾਰਾ 304 ਤੇ ਐਸ.ਸੀ.ਐਸ.ਟੀ ਐਕਟ ਦੇ ਮੁੱਖ ਦੋਸ਼ੀ ਨੂੰ ਸ਼ਰੇਆਮ ਇਸ ਲਈ ਖੁੱਲ੍ਹਾ ਛੱਡਿਆ ਹੋਇਆ ਏ ਕਿ ਉਹ ਪੁਲਿਸ ਅਧਿਕਾਰੀਆਂ ਦਾ ਚਹੇਤਾ ਹੈ। ਉਨ੍ਹਾਂ ਵਧੀਕ ਡਿਪਟੀ ਕਮਿਸ਼ਨਰ ਦੇ ਧਿਆਨ ‘ਚ ਲਿਆਂਦਾ ਕਿ ਸਥਾਨਕ ਜਿਲ੍ਹਾ ਪੁਲਿਸ ਮੁਖੀ ਦੇ ਇਸ ਪੱਖਪਾਤੀ ਵਤੀਰੇ ਖਿਲਾਫ਼ ਹੀ ਮਜ਼ਬੂਰੀ ਬੱਸ ਕਿਸਾਨ-ਮਜ਼ਦੂਰ ਜੱਥੇਬੰਦੀਆਂ ਨੇ ਸਿਟੀ ਥਾਣੇ ਮੂਹਰੇ ਪੱਕੇ ਧਰਨੇ ‘ਤੇ ਬੈਠਣ ਲਈ ਪ੍ਰੋਗਰਾਮ 11 ਮਾਰਚ ਨੂੰ ਸਾਂਝੀ ਮੀਟਿੰਗ ਬੁਲਾਈ ਹੈ। ਉਨ੍ਹਾਂ ਚਿਤਾਵਨੀ ਵੀ ਦਿੱਤੀ ਕਿ ਧਰਨੇ ਕਾਰਨ ਪੈਦਾ ਹੋਣ ਵਾਲੇ ਹਰ ਕਿਸਮ ਦੇ ਹਾਲਾਤਾਂ ਲ਼ਈ ਮੁੱਖ ਦੋਸ਼ੀ ਡੀ.ਐਸ.ਪੀ. ਨੂੰ ਗ੍ਰਿਫ਼ਤਾਰ ਨਾਂ ਕਰਨ ਵਾਲੇ ਸਥਾਨਕ ਪੁਲਿਸ ਅਧਿਕਾਰੀ ਜ਼ਿੰਮੇਵਾਰ ਹੋਣਗੇ। ਕਿਸਾਨ ਆਗੂਆਂ ਨੇ ਪੁਲਿਸ ‘ਤੇ ਇਕ ਮਹੀਨੇ ‘ਚ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਨ ਦੇ ਵਾਅਦੇ ਤੋਂ ਮੁਨਕਰ ਹੋਣ ਦੇ ਗੰਭੀਰ ਦੋਸ਼ ਵੀ ਲਗਾਏ ਹਨ।
